2011 Census a ipi ihi diu ham?

By Thongkholal Haokip

Posted 26th February 2011

India sorkar in kum som jou seh le agam sung’a mihing jat asim jin, hiche simna chu tukum ahunglhung kit tai. Hiche mihing jat simna a hin mi jouse a kon alhang pi’n a jat (tribe), lekha bu ijat chan asim, natoh na, a pen kum kiti hohi akila jin ahi. Hiche data ho hi sorkar ahin, academician, policy maker, le adang dang hon amangcha jiuvin gamsung le mipi a din tohgon tamtah aneijiu ve. Hiche ho lah a in adeh in pao/tribe hi akive pen le akul pen khat chu ahi. Ahin eiho pao khat tho hon hiche thu a hi kitona inei pouvin chule aboina hi seichetna tu channa ineilou lai jeh un lhahsam nale musitna tamtah itoh taove.
Hiche pao le jat min hi seichet ding angai dan nengkum a pat scholar hon ana kiphong kang jing in, ahin koi man, adeh in lamkai lang hon, nahsah in ina neiji pouvin, tu a census ahung lhun mong mong phat nin iboi kit taove. Boina akito teng le bou kindot na khangdoh jiji ihi jing diu ham? Hiche thu hi kum 50 masang’a chu i lamkai masa hon suhchen na ana nei diu doltah ahin, hinlah kimaito a seitoh ding joh ana gong talou uvin gal’a pat kidemna a ana mahtah jeh un tuni chanin suhtoh louvin a umjing in ahi. Hiche thu a thulhahna inei theilou jeh un i nam sung u jong kilungtona dihtah ana umthei pon, hitobang’a iki lungto uva ihat theilou jeh un atampen te le nam sung lamkai ding te hijong leuhen isopi’u tribe dang hon belthei in ei mu tapouve. Bel malah akidalse cheh cheh un, nam dang kahiuve atigam taove.

Thadou

Thadou kiti hi ihetsa ma bang un, phunggui chedol’a mi naopa khat chu ana hi ahi. Ama chilhah ho chu British ten ana kisuhtopi masatpen ahijeh chun British ten eiho thu chu amaho a konin anala un, jihdoh naho ananei uve. Tu khang’a ethnicity le tribe consciousness ana neilou jeh un ‘Thadou’ chate kahiuve ana tiu le tu a paokhat tho sese hi ‘Thadou’ in eina hetaove. Ahin India in chamlhatna ahin nei jou chule chihna thepna ihin nei phat un hiche tribe min hi deilou ahung umtan, hiti chun kum phabep pi ina boi un, court kisan na ina kiheh un ahi. Hiti chun 1996 a Guwahati High Court in Expert Committee ana sem in, amahon akhol jouvin ‘Thadou-Kuki’ tin thutanna ana nei taove. Hinlah hiche thutanna a chun i lungkim deh pou vin ahi.

Any Kuki Tribes

Manipur tailou eiho umna state jouse a Kukite jouse chu ‘Any Kuki Tribes’ sung’a aum soh kei in ahi. Hitobang chun Manipur a jong ana umthei nama leh Chandel district lang’a tu a ‘politically Naga’ kahitai tiho jong ‘Any Kuki Tribes’ noija uma chule Kuki nam min na kitohtah a khat kihi a kihat ding ahi. 2003 chun Manipur a ‘Any Kuki Tribes’ ahung kithah koilut kit in, ahin aphatna ding ngaito a kibol ana himaithei jong le hiche hi lunggiltah a ingaito leh tutu dinmun a din aphatna umbehset louvin akimutai. British ten eina hopkhen dungjui uva ‘Old Kuki’ sese chu jao tahih jong le ‘New Kuki’ tribes jouse beh ‘Any Kuki Tribes’ sung’a umsohkei thei le aphatna um nante. Ahin tu a Paite, Simte, Vaiphei, etc chule Thadou jong achom’a uma ‘Any Kuki Tribes’ jong umkit chun avetsah chu ahile pao khat tho a ahivang’a ‘Thadou’ kiti nomlouho ding sehseh dan nin a umdoh tai.

Academic View

Tu chan na eiho hi anthropologically le linguistically ‘Thadou’ tia ei kihe u ahi. Nam dang hon, adeh a ei munomlou ho kitimai leh, eiho boina hi ahe mama un, hijeh chun iki thuto lou nao le iki pumkhat theilou naho hi mangchan eihokah a sagu asep jing uve.
Academic research bol, adeh a history, anthropology le sociology subject, hon eiho hi ‘Thadou’ akimang jing in, ahin Kuki tia mang aum jong le eiho sung tamsut u jong leh tribe dang ho chu themkhatbeh comparative study ahiloule akibang jeplou a umle atahlang jiuve.

Conclusion

Boina ito hou chomcha in ihinsei taovin, tutu a angaicha chu ahile eihon tribe min iti ikijih diu ham tihi ahi. India hi chamlhatna gam ahitoh lhonin mihing jat (population) tam le lhom athupi dan hi ihesohkei uve. Population politics hi tukhang’a ethnicity le ethnic consciousness ahat toh lhonin eihon jong hiche hi i hetsoh kei uva chule i manchah diu hi thilpha ahi. Hijeh a chu eihon jong lunggil in ngaito utin, lunggelthem nale khonung ding gelsao puma pan ilahdiu hi deisah ahi.
Tukum census a ‘Any Kuki Tribes’ le ‘Thadou’ in kikilah le eiho mama thakhat kihi jong le population politics ahung hiteng le ni ihiuva, Manipur a tribe lah a alhom loi ihidiu ahi. I bol diuva deium chu ahile tribe min khat a kilah ding hi ahi. Hijeh chun tu ahunglhung ding kum som sung din ‘Thadou’/’Thadou-Kuki’ in kilahphot ute tihi kei deisah ahi.
Thadou hi ho le Thadou pom hon ‘Thadou’ hi amaho tum’a gel louva, chule ‘Thadou’ pomlou hon jong 2011 census sung’a ‘Thadou’ tribe kijih man na nemna le Thadou noija kaum tai tia kilah louva, malam’a machalna ding’a kal khat song in kigel ute. Kahinseilo napen chu ahile tu a ‘Thadou’ ikijih jeh uva Thadou ihisohkei taove tina hilouva, tribe/pao thu a iki boinao hi kihoulimna ahiloule dialogue/negotiation patna a iman uva, ahunglhung ding phat ho a suhchet loina ding ngaito joh ding tihi ahi.
Adang ho chomseina ahihih in, eiho pao khat thoho iki thuto uva khat a idin theilou uva, son thei le belthei ihilou uleh ijat in mi kihuop henlang Chikim ahiloule Kuki nampi kiti ti jong le aphatchomna tahtah ha umdin kagingcha poi.

Leave a Reply

Your email address will not be published.