Kukite Khochen le Kivaipoh

By Thongkholal Haokip

L. Salemphai (Wakan) Baptist Church Golden Jubilee Souvenir, 2019

India sah solam gamkai a cheng ho lah a haosa a kivaipo thinglhangmi ho lah a haosa hereditary hi a chejom jing chu Kukite hi hettheipen khat ahi. Masang chun isopiu Lushei ho jong eiho bang in ana kivaipo un, ahin Mizo gal lai chun ana subei taovin ahi. Hijeh a hi India keo hilouva vannoija hitobanga kivaipo nam lhomcha ho lah a khat chu ihi taovin ahi.

Masanglai gam le go anen lai chun ichen nomnom nao gam ho a kho isat un, ichonna dan dungjui uvin phung chedol a upa ten alamkai un chule haosa in jong apang uve. Hiti chun mihem ahung pun a kho ahunglet phat leh minaopa ten upate phatsah le phattheiboh dungjui in khothah anasat jiuve. Hiche hi lou lho ding le gancha vahna ding gam ahung neo jeh ana hipen e. Hitichun igam lo ujong ana kisulen nin Kuki gam ana khang e.

Chondan khandan kiti hi akhang che dungjui le agamkai dungjui a olol a kikhel le kikhe jep chu ahinai. Hinlah inam sung uva chondan pha hohi tuchanin akikhel naipoi. Tekahnan, Khankho le Tomngaina hi tuchannin ichepi jing nalai uvin, chule ahunglhung ding phat te ho a jong chepi jingthei khat chu ahijing ding tahsan ahi. Khankho kiti hi mihem khat chu khosung a iti hung khanglen ham; adeh a umchan pha le mi veijuitheitah a ahung kikhan lhit ding chu tina ahi. Khosung a chaga meithai ho khoto nan khomite anadim un, sil le chen, neh le chah in jong hitobang ho chu ana kithopi jiuve. Chule haosa in jong kumseh le khomite jouse to dia lom changseo jong chu meithai chaga ho ana to sah ji poi. Chukeo hilouvin changlei a chan-at teng, bal le adang dang ho aki chodoh teng ahasa meithai chaga ho kichom ding tin changkhai akidalhan chule bal le ha ho jong ana kichou ngimhel ji poi. Hiche hi Kukite chondan dungjui a khankho chu anahi. Hiche khankho a aki khosat teng mi khotona a dim tina ahi.

Chuleh tomngaina kiti jong hi khosung kivaipoh naleh chenkhomna a ngaichatah khat ahi. Hiche tomngaina hin adeh a khangthah ho akomu pen chu ahileh atha seng a mi kithopina anei diu hi anahi. Hijeh a chu khochen dol a gal le tol ahung um a, ling kiho, twi so le adang dan toset jeh a thina man na ahung umteng tomngaina chun eina vengdoh jiuve. Hijeh a hi Kukite khosat dungjui a tomngaitah a khangthah ten hahsat genthei nikho a pan alah diu hi amaho kin khat ahi. Chujong le khosung a hung kichou thah le meithai changan in asah teng khosung a khangthah jep hon manbei in ana kithopi jiuve.

Masanglai lenggam ho le sorkar ho in eihin vaipoh masang uchun iki vaipoh dan uchu vetjui theitah le aphapen in jong ana um in ahi. Ajeh pentah chu koiman neival neilou chule neinom loulai ana hi. Hijeh chun kum khat a nehding ina nei uleh hiche alhingset anahi in ahi. Hinlah British ten India le Burma ahin lo a, eiho Kuki gam jong ipu ipa teovin jalen gal kumjabih 1917-1919 sunga anasat uva alal jou nung uchun polang a konin eiho kivaipohna chu ahin tongkha pan taovin ahi. Hiche gal jouva pat Christianity ahunglut nin, ipu ipa teo chondan ijat ham khat Christian chondan toh kitohlouva inagel hou chu ina dalha un, ijat hamkhat ikhel uvin, chule adangse chu notthap in akikoi gam tai. Vannoi gallen anina a chun Japan te le Subhash Chandra Bose lamkaina Indian National Army a jalen munadin pan inala un, ahin axis powers ho chun gal alal phat ucun hiche chamlhatna idei uchu ina mudeh tapouve.

India in 1947 kum a chamlhatna ahinmu chun gamtum kivaipona kipe holah a ina pang pouvin; Assam, Nagaland le Manipur keo hilouvin Burma kisan na igam u aki homthang in ahi. Itam napen u chu Manipur state noija ana umtai. Hitichun British te ni vei isat jeh uvin eiho suhnem na din igam u mi khut thahatna noija ana kikoi in chat theilou hel in ina um uve.

Hitoh lhon chun 1961 a pat nin Manipur sahlang ichen nao atamjo a konin olol in eihin kinodoh in, 1993-1997 chun galpi anasoh in gam ijatham khat ihin dalha taove. Hiche idalhah sao gam hohi ga lelah kit thei jong chu ahi tapoi. Hinlah hiche ho jeh a lunghang jing’a kilethuh ding gotding chu thilpha ahidehpoi. Hisanga chu masang a iti ikhosah uva leh deldoh thei ihi uva hiche ho a konna chu kihilna a inei uva tua ichen nao hohi iti ihuhthei diu ham tijoh hi gelphat ahitai.

Masang state/government a kivaipohna ana um masang chun kho le kho kikah a kidouna chu asangpen anahi. Hiche khang chun kivenna ding thal hoitah ana kinei pouleh kho in lhomcha a chen chu kivahna ana nom jo in ahi. Hinlah nam khat hina kihetna le chihna thepna le kithutona ho British ten ahin pohlut a pat ichen khompiu ana ki tohlou le kisatto techu ahung kilungtoh un eiho joh vetda ihungchang taove. Lhomcha a chengte ihijeh uchun hahsalou tah in eihin nodoh thei uve.

Tu dinmun vannoi a state system tichu sorkar a kivaipohna khang a hi state neiloute chu alhasam nam hijeng khang ahitah jeh a i khochen dan uhi velvet kit ngai mong mong ahitai tihi amitakip lunggel chu ahitai.

Sorkar noija ihung um uva Christian ihunghi uva pat nin inchen khosah jong ahung kikhel in ahi. Masanga kumkhat nehding bou (subsistence economy) ana boipi a ana phathei le lungkimte chu chate naote lekhasim sah ding ihin gong  gam taovin, hijeh chun kumlhung a kivah nading keo hilouvin amaho lekha simsah nading jong ihin holpan uve. Hitichun igamsung uva jong sumkol veina (market economy) ahunglut nin; loulho jong masanga sang in johding pumin ihin lho tha pan taovin, gam le go jong achesa kum sonmnga sunga hin ahung chai tultul in ahi.

Tukhang in gamsunga chihna thepna ahunglut tolhon nin sorkar natohna jat chomchom a natong jong ihungtam pan uvin, chule sumkolveina jatchom chom a kihinso jong ihungtam taovin ahi. Hijeh hin olol in gam le go a kivahna (pressure on land) hi ahunglhom jep in akilang in ahi. Ahin mijouse sumkolvei le sorkar natong a kivahthei ahiloujeh in gam le go hi ijatham kaht na kihinsona hithou thou ding ahi. Hijeh a chu hiche gam hi iti manchah a akhang khang a jong manjingthei (sustainable) hisah ding ham tijong hi geldia kultah ahitai.

Hiche keo hilouva tua igam toupha ujong midangho a konna iti venbit jing ding ham ti jong hi gel louva khoh khat ahi. Pathen in eipeh u gam hohi gam nomtah le chang le mim putna ngan ahin, adei le eilahpeh nom atam in ahi. Kum 25 masang in gam ijat hamkhat ichan taovin, tua ichennao hi iti huhbit ding ham tihi tukhang a igelkhoh diuva poimo khat chu ahitai.

Nga in atam athipi in mihem in atam ahinpi e kiti hi tulai a kichepi chu ahitai. Masang chun lhomcha a chen chu kihinsona dia phatah ana hijongle tukhang a hi hitheilou ahidan ihetsohkei u ahi. Itam chenkhom le khosung a chu dukan a kivahthei in ijat hamkhat umthei intin, anche lei lhouva anche joh a kivah umthei intin, school oja pang umthei intin, chule adang dang tamtah chenkhom jeh a phatchompi thei um ahi tihi ihesohkei uve. Hiche keo hilouvin, kho len chu khodang hon jong aja jep in, chule sorkar in jong mipite phatchom na dia thil abol kigot jong le office, police station, school, chule scheme dang dang ho koi ding le pat nadin jong kholen chu deisah ahiji e. Hijeh a chu tam chenkhom hi tukhang a kihinso na khat ahitai.

Ichennao gam ijat hamkhat in avelal le eineh jing aumjing toh lhonna nam pumpi a dia strategy khat hi angaidan hi akilang jinge. Hiche igam u, adeh a sahlang gam le phaigam gam toh kichin a umho, hi huh nadin lamlen (national, state, le district highway ho) a konna midang hon atophah masatpen u kho hohi khopi so angai in ahi. Igam u aningpen hohi kho pilhing ahiphot le asung/alailung a ho chu neocha cha hijong le khoh behsetlou ahi. Sadar Hills Twilang area (IT Road) a dia Tamei toh kinaipen Thenjang le Govajang kho teni hi kho pilhingtah so ngai ahi. Chuleh DM Road/NH-2 a dia Taphou Kuki le Hengbung hi kisonpi umtah khopi sotei ngai ahi. Ukhrul road a dia Mongkot Chepu le Litan hi sem angai in, chule Tengnoupal district din Sita kho sahlang a khochaina khat – Simang kho ham, sem angai in ahi. Chukit le Noney district langa dia Khoupum lampi (Old Cachar Road) le Tupul lampi kisuhtona a um Joujangtek (Lambung) hi pilhinsah hi alhang a dia ngaicha tah khat chu ahikitne. Hiche kho hi Noney district a um ahivanga asah alhang hi Sadar Hills le Churachandpur district ahi. Tutadi a Assam Rifles camp um, police station jong umdia Manipur sorkar in aseilhah sa ahitai. Hiche kho hi milong tetoh gamgi ahiuvin, aphatthei uva apilhin uleh Leimata lhang langa chengho jong lungmong tah a cheng thei diu ahi. Hiche kahinsei hohi tamtah lah a akhohdeh kalung a umho kahinsei ahin, muntin le lhangtin a um hon agam le lhang i hetthem dungjui uva hitobang lunggel hi seikhom a iki vaipoh nao inpi ho a pohdoh a tohmolso nadia panlah cheh a pha khat chu ahi.

Kukite kivaipohna tutadi in Kuki Inpi inei un, ahin hiche Inpi in atohnom tamtah seilhah a aum vang in atongdoh thei naipoi. Hiche ajeh adang ijatham umjong le tutadi a angaicha pen khat chu Inpi lamkai hon Kuki interest chu “without compromise” a achepi ngai ahi. Hiche nadin lamkai pha ingaicha uve. Tulai lamkai jong minister, MLA, DC, SDO lunghol gunkei jong itam taove. Hitobang lamkaiho chun gamsung le namsunga dia thil phachom ahin boldoh ding kinepna aumpoi. Nampi in angaichat chu hichu hilouva hitobang sorkar vaipo le lhacha hochu amaho thu a anunsah ding joh ahi. Hiche umthei nadin ilamkai hou jong che le vale nading le cholam angaichat uhi aneijing u keo hilouva lhalo sempeh thei ahile sempeh a pha ahi. Hiche ho aumtheina dia Inpi in kumseh a Kuki Inpi in kai le don ana got uchu phate a chepi a mipi injong panlah ding hi a poimo in ahi.

Kum le lha akikhel dungjui le khang akikhel a vannoi jong kivaipoh dan le kimanchah dan akikhel dungjui, ichang uva cheng le midang toh kipawl lou ihilou jeh uva, khosung le nam punpi a kivaipoh dingdan angaicha kagel ho themkhat kahin jihlhah ahin, seikhel seival aumle ki ngaidam ute.

Leave a Reply

Your email address will not be published.