Masang Gangpijang khochen le neolai hinkho

By Thongkholal Haokip

Gangpijang kho hi 1961 kum in ana kisat nin, atamjo Naga hon India douna a gal ahinsat kipat uva chuleh amaho tamna Manipur sahlang gamkai a cheng Kuki ho asuhtheng nom jeh uva ahin nodoh ahilouleh ahung jamdoh ho grouping centre anahi. Hiche ahung kichondoh kho ho chu ahileh tua Ukhrul district lhumlam gamkai a ana um Khokon, Wasangphung, Leisanphung le Changsang khomite anahi. Gangpijang kho hi kapen namun ahina ban nah 1987 kum kim chan kana um in ahi. Hiche kum khat sunga ana peng ho chu ahileh tu a KWS Bangalore a pastor Rev. Silas Jangminlen, aum talou Lenneo, Tilthang ho anahi in ahi. Gangpijang a anacheng ho chu atamjo ana chennao Ukhrul gam a konna kho ijhat ham kisukhom ahijeh uvin kho dang bang louva phungtin kilongdel a chenkhomna chu anahi. Hiche kho ahung kisat lo najeh jong hi tukhang a khangthah hon ahet uva, kihambolna le nam ngailutna aneibe na diuva poimotah khat ahi katinom me.

Gangpijang hi kho kisat til laija chu tua phailei atamjo hi gangpi phung ngan anahi. Hiche gangpi ho chu ana kivat ngim a kho ana kisat ahi. Hijeh a kho min jong Gangpijang ana kisah ahi. Ei khohet til lai in jong V.M. Nazareth school lui umna apang vel lah jong gangpi ana mang ketkut ne. Chuleh si-al ana hat nin janseh le si-al ham ana kija jin ahi. Hiche si-al ho jan leh ahcha guh ana hat jeh uchun ah-buh jong sangtah in ana kisa jin, khojin kon leh phaten ahcha ho ana kihoilut jin ahbuh kot phatechan ana kikil khum jin ahi. Gam le go phat lai ana hijeh chun tinthapat jong khal lai kisan leh twi ana kang ji pon, thambal ga le ajung ho ana kiki hol jin ahi.

Gangpijang kailhang chu neocha ahi vang in hiche khang a din idei ingaichat atamjo ana kimun ahi, ngaichat jong ana lhom jeh hi maithei ahi. Pu Papao ten hotel anabol uvin, Pa Maila in dukan anabol chu Gangpijang te titah louvin, Satang le Bilei lang ho jong thil choh nan ana mang jiuve. Hiche phat laija chu amaho lhang lang jong Saikul bus a phai anajot jiu ahi. Hiti ahijeh chun Yongchakmakhong chu chomkhat dukan tamtah anaum in ahi. Hiche late 1980s le early 1990s chun Yongchakmakhong a chun tailoring centre jong ana um man ne. Amaho Pukhao bus a ahung lamlhah phat uvin hiche dukan ho akem suhsuh in tuhin hiche jonglha phung lentah mang ketkot a phailei chin a ana keh jong 1990s chun agop lha in aum tapoi.

Hiche khang lai chun Manipur pumpi a Gangpijang Kuki Cultural Troupe chu hetthei tah in ana um in “Golden Years” tithei ahi. Pu Otkhokhakhai le Pu Thongkhohen (Khohen) in ana lamkai in State Level Kut ho titahlou vin Manipur gamsunga kin thupi tahtah ho a lamna ana nei jing uvin ahi.

Kumseh le Chavang Kut hi ana kimang jing khat chu ahin, lawm gol tamtah ana kihomkhen jin angai a kichep golseh a kitetna keo hilouvin golnop kimang ho anopbe nadin lasathem le atot them ho jong ana kikou jin ahi. Kum khat chu Senapati Deputy Commissioner ana hi laijin Pu T.L. Kuki (Telngoh Lunkhothang) chief guest in ana kikou in, lhanglang a pat khonah gei in a ambassador car chu khao vin ana kikai lut peh e. Hichelai a chu haosate in chu khonahpen anahi in, amaho leitol a chu Chavang Kut chu ana kimang ahi.

Saikul lang a dia footbal lunglut pen loi chu Gangpijang te anahi. Kapa ho khang chun lhang sports ho a pan anala jing uvin, football themloi kho a ana kihet naban uva trophy jong champion ana la jiuve. Hibang chun playground nei masaloi jong ana hikit ne. 1980s chun nilhah seh tobang chu gollhang ho football ana kichem jiu vin, ahitheilou nasasa a hiche khang a Pele in world cup a goal khat bicycle kick a ana khum chu atho anatam in ahi. Adeh a kamelchih chu masang hou-in veng langa ana cheng chuleh chulaija gollhang chapang pu Haomang chu anahi. Gangpijang ground chu nom ana kisa in kengkou jeplih hi kana habol in, jan khat hi adih le adihlou chu thuchom hitaleh ka geldoh jing nalai khat chu kaloi hotoh chomnu khat ground a chun kamu uvin, ka del uva a khusubi chu lahpeh ding kangaito uleh ka delpha jou hihbeh uvin ahi. Jan ahijeh ham chomnu chu a vom in ato gapphet in chulai a chu eichan ana hi. Tua igah thah gel kit leh nuijat jong aum e.

Vangphat umtah chun education lampang a jong 1978 a pat in V.M. Nazareth School ana um in khosung miten gampam jon louva school kaina ana neithei uvin ahi. Chuleh hiche school mama chun jingkah le Government Lower Primary (L.P.) School chu ana kikai jin ahi. Lekha hethei jep tichun jingkah matah le ojapu Papao chun simlai adang ho chu aw-thong leuvin kanung ana juisah ji chu kahe jing nalai in ahi. Nikhat hi Hari bus Ekou le Gangpijang kikah a vadung langa akitanglha in jingkah school kai talou vin L.P. School simlai sese chu avedin kaga che peh uvin ahi. Hiche jingkah a Hari in asei chu – “mi atoulou pet a tosetna kato hi kavang pha ahi” ati in ahi.

Hiche phat lai chun Ekou hi thangja ni (Saturday market) leh bazaar ana um jin, Ekou pumpi chu ana kiteh leo vin lhang pumpi chu bazaar ana kikai jin ahi. Hiche Saturday market a chun coat second hand khat cheng 3 in kana kichoh in, kum tampi kaki-ah jouva jong aset joulou jeh chun midang kana pe leuvin ahi. Nikhat hiche Ekou bazaar kakai jou u chun bus mi akite ji val jeh chun kapi Lhinghoi le kanu Neinu toh keng in kanache masa taovin ahi. Kaneo lai chun kana lip in, muntin kave in kakilhonpi hochu thudoh kana nei jin, eina theida leu jiu vinte. Hiche nikho chun kapu Semkam phailei phah masang mun chimlhah nom naji khu kahin khel jep uchun kaki nunghei leh bus hung chu Ekou lei khel a lamtou themkhat um a khun a kal lal in aki nungtol chu gal a pat a kamu chu kanu leh kapi kaseipeh in ahi. Ka nungche uva kaga lhun uleh Wakan a cheng Pa Tongjang chu bus chun ana lhuhkhum a ahinkho beisa chu kaga mu uvin ahi.

Neolai chun kangtalai kitol jong ana kibol jin ahi. Tua aum talou Jacob Chungneo, Lalkeng le loiteho adang dang hotoh Nazareth school lui komlang kanglei aken lah a ana kikitol jin ahi.

Masang lai a changphu jou chuhlai a ana ki habolpen chu phailei a bom-do hi anahi. Hichelai chun tulai banga gu (chemical) le electric ana kimang loulai ahijeh in nga ana neng in phailei a jingkah seh le neh khamset nganal le adang dang ana oh jin ahi. Hiche chu aki hahgop a me lah a akilhah leh atui dan chu ana jatchom in ahi. Jingkah matah L.P. School aki kai jou leh chapang cha akihi vang chun loulhou ho cha le nehthei thah in ana kipang tan ahi.

Chuleh tulai hi khangthah ho nachie ji nalai diu ham vang kahepon, khal lai leh vadung a kisil in ana kiche jin, hijeh chun twi lah a kijap je hi ana kihen, kijap je het hi hinkho a dia poimo tah khat chu ahi. Ajeh chu twi lah a toset toh a twi jep theilou chu thi le hin kikah ahijeng in ahi.

Tuhin atamjo eima car in ivahle taovin, ahilouleh car ham auto ham iki hire ji taovin ahi. Hinlah masang chun gari ana umbeh pon, bus ho jong kikhat tah in ana lhai jin ahi. Chapang hon bus ana kivetnom ji jeh chun molkot a pat bus hung chu idel leh lhanglang a ana kipha jin, ajeh chu lampi jong ana nom pon ahi. Hiche laija ana minche chu Benu Bus anahi. Hiche bus ahung phat le tua aum talou kanuneo Boicy chu kakou jin “Henu Boicy Benu bus ahungte” tin kana sam jin khucheng in lhanglang ana kidel jin ahi. Hijeh chun hichelai gollhang hon “Benu Bus” in eina kou jong atam uvin ahi. Hiche phat laija suhmil theilou khat chu kum khat Sadar Hills district demand bolna thu a kiphinna Senapati a ana um in ahi. Hiche chung chun sepai hon Pu Seikeng ahin kaplih uvin, a long jeep a ahinpoh uchu khoto a khosung mipi in ana kingah in lunghem tah in ana kilhadoh in ahi.

Gangpijang hi tua akihung kit ji teng neolai lungmit chu alang jing nalai in, hiche phat a chu ground chu len mama a ana kimu ahi. Ajehchu 1987 kum kim a kadalhah chu kihung vahlut tem theilou ahi. Masang neocha le nemcha ihi a kapu Semkam inmai a pat khosung kigalvet a ana ki khosah mitmu chu alang jing nalai in ahi.

Tuhin masanga pat school hoitah le ground nomtah aum in, chuleh che le vale jong anom in, internet jong phatah a alhun na mun ahin, hiche hohi khangthah ten advantage nalah uva lekhasim nalam pang hihen sports thanom hijongleh malam a career hoitah sum le pai lut behset louva khosunga nakisemdoh thei nao mun ahi. Masang ipu ipa teu chenna Ukhrul gam langa ana kicheng nalai leh hitobang khantou machalna hin eiphah loulai maithei u ahi. Hiche thu hi JNU Eimi prayer cell a phatah in simlai ho tilkhou nan kum masa lang chun kana nei khan ahi. Hichelai a oja kana pan khompi Dr. Jangkhomang Guite jong Ukhrul gam a konna galjam ana hin, Moreh a achenna uva konna lekha phate a ahinsim a JNU a oja a pangthei a hung kisepdoh ahi; tun ama Manipur University a ahung kichon tai. Gam lentah ichaan vang uva Pathen in alangkhat a ei phattheiboh nao hi mohseh a lhaso louva kisemdohna le mitdohna chuleh nam pumpi a dia phachom khat ihung hidiu ahi Pathen keu hilouva insung le khosung mite deisah ahi. Hijehchun khamnathei ju le sa a lop louva hetna le chihna hol puma tupna nei a nampi sutpi a pang dinga khangthah ho nu le pa, pi le pu in kinepna anei ahi tihi suhmil louding ahi.

Leave a Reply

Your email address will not be published.